مطعم اسماك قدورة

محمود ناجى نصرالدين محمد

سلسلة مطاعم قدورة هى من اشهر وافضل المطاعم فى مصر. تضم سلسلة مطاعم قدورة عددا كبير من الفروع على مستوى المحافظات ( القاهرة - الاسكندرية_...) . بس انا بصراحة بفضل الفرع اللى فى شارع جامعة الدول العربية فى المهندسين . الاكل هناك جامد جدا وطعامه روعة . هو بيقدم مجموعة متميزة من وجبات الاسماك المختلفة التى تتناسب مع كل الناس . هى بصراحة الاسعار عنده مش رخيصة اوى ياعنى بس اللى بيعوض ده الطعم الروعة للاكل عنده. وكمان سلسلة مطاعم قدورة دائما تختار اماكن لفروعها متميزة جدا . ده غير بقى نظافة المحل وديه طبعا اهم حاجة فى اى مطعم . وانا اكتر حاجة بحب اكلها عنده هى الجمبرى . بصراحة اى حد ماجربش ياكل من عنده لازم يروح يجرب ومش هيندم.

Mohamed Rezq

قدورة" اسم له صيته وشهرته في عالم المطاعم التي تقدم أفضل وجبات السمك، وهو الدليل على أن الكفاح يمكن أن يؤدي إلى نتائج مبهرة، فصاحب محلات "قدورة" للأسماك، الذي أصبحت فروعه تملأ الإسكندرية والقاهرة الآن، مجرد صياد بسيط كما يقولون عنه و محلات قدورة إفتتحت أولا في الإسكندرية على كورنيش اسكندرية و المنتزة و الأنفوشي ثم إنتقلت إلى القاهرة في المهندسين قدورة يقدم الطواجن بجميع أنواعها: السبيط والسالمون وصدف البحر، ومن أشهر المأكولات التي يتميز بها المطعم سمك البوري السنجاري المشوي بالخلطة، والإستاكوزا بالزبد، وطبق الملوخية بالجمبري، وهي أكلة إسكندرانية عيبة الوحيد ان إسعاره غالية حبتين فثمن كيلو الجمبري الجامبو في حدود230- 250 جنية و ممكن أكتر . و طبق الشوربة أقل حاجة 15 جنية و طبعا الأسعار دي ممكن تتغير من وقت للتاني

Pola Adel

من الاخر لو سمك يبقي قدورة. اروع اكلات بحرية ممكن تدوقها في حياتك من جمبري وسمك فيليه ومشوي وبلطي وبوري وسردين وسي فوود روعة ومن أشهر السلطات السلطة البلدي والطحينة والبابا غنوج والمخللات. وطبعا قدورة له فرع في الاسكندرية كبير جدا والقعدة تحفة. شهرة «قدورة» ترجع لزمان اوي اللي اتحول من محل صغير ايام جدي و جدك إلى أشهر مطاعم الأسماك في الإسكندرية، قدورة مرة صاحبي شاف فيه ايساف بياكل مع اصحابه وراح اتصور معاه. وده معناه ان قدورة بيروحله كل الناس. ناس عادية وفنانين وناس مستواها عالي اوي كمان هتلاقيها هناك.

JASSY MINA

مطعم قدورة للسمك الله علي ده مطعم لا مطعم اية مطاعم قدورة كلها بكل فروعها في القاهرة وكمان اسكندرية مأكولات بحرية عالمية بجد نظافة وطعم وجودة وخدمة بجد سمك متلاقيش زية بجد في اي مكان طازج درجة اولي انا بجد لازم كل ما اروح اسكندرية لازم لينا اكلة تمام من عنده سمك وجمبري ولا بجد بأه شوربة السي فود الله عليها بجد مكلتش زيها في حتة روحت مطاعم كتير لكن زي السي فود بتاعة قدورة فعلا كل مراحش محلات ومطاعم قدورة اشهر من النار علي العلم مين ميعرفهاش وكل فرع احسن من التاني بجد في خدمتة واكلة والشيفات والذوق الراقي بجد حتي في طهو الاكل والحرص علي ارضاء جميع الاذواق وكمان اسعارة محصلتش انا عمري ما باكل سمك في البيت انما اكلة في قدورة وبس.

Mohamed Mesregah

نفسك تاكل وجبة بحرية كويسة بأسعار مناسبة... عايز تاكل سمك عايز جمبري أو شربة سي فود أو اكلات بحرية لذيذة جدا... يبقى لازم تروح مطعم قدورة أحد أقدم وأعرق مطاعم الأسماك في مصر... قدورة موجود في شارع جامعة الدول العربية العريق في مصر.. ممكن تاخد وجبة محترمة ويكون السعر للفرد تقريباً 50 جنيه فقط... وعلى فكرة ليه فرع في الاسكندرية... وكمان موجود ليه فروع في بعض الدول العربية... المطعم مكون من ثلاثة طوابق... واسعاره تعتبر من متوسطه الى عاليه نسبياً... طبعاً مطعم راقي ونظيف.. كل اللي عليك ادخل المطعم... روح اختار السمك اللي عايزه.... خد رقم واقعد على الطاولة... وانتظر اللحظة السعيدة.. لحظة وصول أشهى الأسماك.. لحظات سعيدة في مطعم قدورة

Mahmoud Ragab

عايز تاكل سمك؟ يبقى لازم تروح على قدورة .. احسن واقدم مطاعم السمك في مصر. دي حقيقة لأنك لو دخلت المطعم هتلاقي اللي يأكد كلامي، هتلاقي صور وحاجات تثبت ان قدورة موجود من زمان وانه من افضل مطاعم السمك في مصر، ده غير ان الاكل هناك بجد تحفة ونظيف جدا والمكان كمان هايل وقريب من اي حتة ممكن تروحله بسهولة، بس المشكلة في شارع جامعة الدول العربية اللي بطبيعته زحمة. وهناك بتلاقي مكان تختار منه الانواع اللي عايز تاكلها واللي طبعا بتكون دايما طازة. ومن الحاجات اللي فاجئتني اني لقيتله فروع في السعودية في (جدة) يعني ده بيدل على الجودة اللي خليته يوصل بره ويكون ليه فروع وعلى اعلى مستوى .. بس بصراحة اسعاره غالية شوية بس انصح اي حد عايز ياكل سمك ومعاه قرشين عايز يطيرهم يروح هناك على طووول.