فرع البرج
4.2 based on 18 reviews
5th January 2012
انا رحته مع ماما وبابا كذا مرة كانو بيعملو كدة شهادات وتقريبا بياخدو عليها فوائد كل شهر ودة شىء كويس من البنك الاهلى المصرى لانه بيشجع الناس على الادخار برفعه للفائدة على المدخرات ودة شىء كويس للاستثمار المصرى لان فلوس المدخرات دى بتروح للمستثمرين فلازم البنك يزود الفائدة على المدخرات علشان الناس تتشجع على الادخار فتزيد الاموال المخصصة للمستثمرين فينهض المجتمع المصرى وكمان البنك دة العاملين فيه شايفين شغلهم كويس وكمان محترمين اوى فى معاملتهم مع العملاء ودة شىء كويس لان بيرفع من سمعة البنك ويزود من احترام عملاؤه ليه.
5th January 2012
من افضل البنوك اللي اتعاملت معها فعلا بنك جامد جدا وخصوصا في سياسة الادارة والتعامل مع العملاء بشياكه وذوق وده اكتر ما يجمل البنك الاهلي انا من كام سنتين روحت اعمل دفتر توفير واتعاملت مع البنك وبصراحه شدني الاداره فعلا احنا محتاجين بنوك كتير زي البنك الاهلي بتعرف تتعامل مع عملائها ومش بس البنوك لكن كل الشركات المصرية ياريت تبقي في تطور وذات فكر ومحدده الاهداف وليها استراتيجيه واضحه زي سياسة البنك الاهلي بصراحه كمان بيقدم مميزات كتير لراحة العملاء منها تعريفهم بالرصيد والزيادات من وقت لاخر عن طريق البريد الالكتروني وغيره لكن عندي عتاب للبنك الاهلي ساعات كتير الماكينات الالكترونيه موش بيبقي فيها فلوس وفي بعض المدن قليله جدا ماكينات الفيزا كارد
27th December 2011
البنك الاهلي المصري ليه عيوب ومميزات، من عيوبه انه مش متوفر صرافات كفاية في اماكن كتير ومن مميزاته طبعا خدمة العملاء فعالة وعلي قدر عالي من الروعة وسريعة الي حد ما وفعلا بيحسسك انه بنك اهل مصر غير كدة بقي انه سريع فى تعاملاته اذا كان ايداع او سحب او غيره غير الشهادات اللى بينزلها كعروض واللى ممكن تدفع فاتورة تليفونك مثلا عن طريق النت من خلال موقعهم الألكترونى او غيره انا عاجبني جدا لوجو البنك و بيتناسب مع التراث الفرعوني ولما عرفت انه بيرمز الإطار الخارجي الأخضر للبيت وبترمز نصف الدائرة اللي لونها برتقالي وتحتها ثلاثة أعمدة بنفس اللون للأشياء الثمينة والذهب ذهلت وعجبتني الفكرة دي جدا
25th December 2011
البنك الاهلى المصرى هوا اكبر البنوك المصرية الحكومية و اللى ليه خبرة فى مجال العمل فى مصر لاكثر من خمسون عاما بيقدم العديد من الخدمات للعملاء المشتركين فى البنك و بيقدملوهم العديد من الحسابات المتنوعة الهادفة لتحقيق متطلبات العملاء و ارضائهم و ذلك بسعر فائدة مناسب و منافس جدا للبنوك الاخرى كمان بيقدم خدمات اخرى زى الاقتراض بفائدة قليلة و ايضا تمويل المشروعات الصغيرة و المتوسطة و ذلك لخدمة ابناء الوطن لبناء الوطن فتحية لهذا البنك العملاق و الذى يرأسه الاستاذ المحترم طارق عامر الذى شهد البنك على يديه تطورا ملحوظا و زيادة فى رأس المال
23rd December 2011
من فترة كده بتاع 3 سنين عرفت ان البنك منزل وظائف للعمل هناك. رحت قدمت اوراقي في البنك وفعلا لقيتهم بعد فترة كلموني ورحت عشان المقابلات والاوراق المطلوبة. اتقدمت بالاوراق جمعونا كلنا في مكان واحد كنا في نادي البنك في مدينة نصر قدام الرقابة الادارية. ومرة واحدة اخبرونا انه في اختبار انجليزي وكمبيوتر ورقي وقبل كل ده دخلت ست فاضلة كده عليها اثر نعمة ربنا انها شغالة في بنك كبير زي ده وقالت اللي باباه او مامته شغالين في البنك يجو بره هنا، مش مشكلة ... كنت جاهز جدا حليت في الامتحان احسن من اي حد وشهاداتي اكبر بكتير من اللي طالبينه للوظيفة وجه معاد الانترفيو. الراجل قال كله يكتب بياناته على الورقة وفي ظهرها يكتب بابا وماما واخواته مؤهلاتهم وشغالين ايه. وده ضد اي شرع ودين وقانون انه كده حصل تمييز في الاول ساعة اما اختارو ابناء الموظفين هناك والتانية في المقابلة نفسي افهم ايه لازمة بابا وماما واخواته واصلا الشغلانة مهياش في مجال المحاسبة.
12th December 2011
البنك الاهلي المصري ده بنك اهل مصر بجد وواحد من اقدم البنوك المصرية ويكفي انه اول من اصدر العملات في مصر ويعتبر من اكبر البنوك تغطية لجميع المحافظات وجميع المناطق ومن اكبر البنوك ايضا مساهمة في المشروعات القومية والبنك ده لما هتخدلة هتحس انك دخلت خلية نحل كل الموظفين بيشتغلوا بمنتهى التفاني في العمل وبمنتهى الاخلاص وهتلاقي هناك خدمة عملاء ممتازة جدا بس عيبها البطأ الشديد وده يمكن خارج عن ارادتهم لأن البنك بيخدم شبكة كبيرة اوي من العملاء داخل مصر وخارجها والموظف بيحاول يخدم العميل على قد ما يقدر وده السبب ان الخدمة بتتأخر.
11th December 2011
البنك الاهلى المصرى من اجمل البنوك فى مصر, بيقدم خدمات جميلة جدا لكل الناس من وقت للتانى, يعنى مثلا اجمل حاجة بحبها شهادة الملايين دى طبعا اللى بيكسب فيها بيكون بالحظ انا لحد دلوئتى ماسعدنيش الحظ انى اكسب بس اهو لسة عندى امل لانو قيمة الشهادة اللى بشتريها مبتروحش عليا يعنى لو عاوزة استردها فى اى وقت بقدر اعمل كده وبسهولة, كمان عرض الشقق اللى على تقسيط 20 سنة اللى لسة نازل جديد ده حلو اوى وهيسهل كتير اوى على شباب كتير, الفائدة البنكية كويسة اوى, كمان بحب بطاقات الائتمان اللى بيعملوها من فترة للتانية بتسهل كتير اوى على كل الشباب بدل ما اشيل الفلوس وتتعرض للسرقة او الضياع بشيل الكريدت دى احسن حتى لو ضاعت بتتوقف بسرعة بمجرد اخطار البنك بضياعها, خدمة العملاء هناك جميلة اوى والموقع بتاعهم على النت حلو ومتاح فيه كل حاجة.
11th December 2011
فكرت فى اخذ قرض شخصى من اى بنك ونظرا لتحويلى راتبى الى البنك الاهلى المصرى فقررت السؤال فيه اولا. قررت زيارة فرع للبنك ونظرا لعدم استطاعتى الذهاب نظرا لتطابق مواعيد العمل بين شركتى والبنك فقررت الاتصال بخدمة العملاء وتفضلوا مشكورين بتوضيح اماكن فروع للبنك مفتوحة بعد ساعات العمل ودى ميزة تحسب للبنك وعند ذهابى للفرع صراحة ضايقنى نقطتين. 1- المطلوب من اوراق ومستندات مختلف تمام الاختلاف عما ابلغنى به خدمة العملاء فى التليفون. 2-المقابلة الفاترة من موظف فى المرة الاولى وموظفة فى المرة الثانية وايحائاتهم بانك غير مرغوب فيك الان وقيام الموظف فى المرة الاولى اثناء جلوسى معه بالقيام بالاتصال بأحد زملائه مما جعلنى فى موقف محرج. البنك الاهلى بنك عريق لذا نطلب منكم تقديم ما هو افضل.
28th November 2011
البنك الاهلى المصرى من اقدم واعرق البنوك الموجوده فى مصر من كافه الاشكال تعاملاته جيده جدا وله مكانات الصرافه موجوده فى كل مكان وعندة شهادات اسثمارة كتيرة لما تدخل البنك تحس ان الناس الموجوده اهلك بجد وبيعمل قرود وعندة ارضى كتير وفروعه كتير انا من عملاء البنك الاهلى من اكتر من عشر سنين اول كارت عاملته كنت فى اسوان كان كارت الشباب دة عشان الحولات اللى كانت بتجيلى من مصر الغريب ان البنك الاهلى الفلوس اللى بتخرج من المكانه جديده كانت صحابى بتستغرب بيقولولى كل مرة الفلوس تطلع جديده وعاملت شهاده استثمار وحجات كتير الخدمه كويسه وخدمه العملاء بيدلوك على النظام اللى انت ممكن تدخل فيه
7th November 2011
بنك اهل مصر زي شعاره انا مش شوفت بنك في مصر زي البنك ده فى تعاملاته والخدمات المصرفية اللى بيقدما للمواطنين الأول بس اتكلم عن فروعه اللى هى ماليه البلد ودلوقت لاقيته بيفتح فروع اكتر واكتر علشان يلبي طلبات اغلبية المواطنين ويجلهم لحد بيتهم وكفاية كميه العماله اللى بتشتغل عنده وهم على اكفئ استف صراحه في التعامل مع العملاء بأحترام والوصول الى ارضاء العميل فى كل وقت وغيركده وكده انه سريع فى تعاملاته اذا كان ايداع او سحب او غيره غير الشهادات اللى بينزلها كعروض اول بأول واللى ممكن تدفع فاتورة تليفونك الموبينيل مثلا عن طريق النت من خلال موقعهم الألكترونى او حتى كفاية انه البنك الوحيد اللى ليه فروع فى الخارج غير كافه البنوك المصرية وده بيديك الحرية انك تحول لأي حد بره ومن غير أى تعب.
29th October 2011
بصراحة البنك الاهلى لايعلى عليه فى التعامل بصراحة من خدمة عملاء لكل حاجة فيه، حتى ان شغلى متعاقد معاه وبقبض المرتب من خلاله وكذلك والدى بيقبض منه برده وده ان دل على شىء فيدل على مصداقية التعامل والسهولة فى تقديم الخدمات وخصوصا خدمة العملاء ازيك يافندم حضرتك تطلب ايه على المستوى الشخصى مش شفت بنك زيه بصراحة حتى ان الماكينات اللى عندنا يوم مايحصل فيها مشكلة تانى يوم على طول تتحل مش النظام الروتينى اصل بكره اجازه وعدى عيلنا بكره انصح اى شخص ان يتعامل مع البنك الاهلى المصرى ويحطوا فلوسه فى امان بس.
27th October 2011
انا عميل لدى البنك من سنة 2002 فيزا ائتمان، عروض البنك مقارنة ببقية البنوك فى مجال اصدار كروت الفيزا لامثيل له، على سبيل المثال لا يوجد رسوم ادارية مفاجئة مثل بعض البنوك الاخرى رسوم التجديد السنوى معقولة، الاستعلام فى اى وقت عن البطاقة من خلال الانترنت(خدمة البنك الشخصى) او الهاتف.
23rd October 2011
البنك ده تمام اوي والقعدة فيه مريحة جدا والمكان نضيف جدا وبيحافظوا علي نظافة المكان جدا، لكن في بعض المشاكل هتعرفوها من حكايتي كنت رايح ادفع 15 جنيه علشان اقدم في مدرسة كدة روحتلهم حوالي الساعة 10 روحت هناك ماكانش في غير 3 بس اللي شغالين من ضمن حوالي 7 قعدت استنيت كل ده علشان ادفع 15 جنيه وفي الاخر الاقي الراجل عمال يهزر معايا ومش فارقة معاه الناس الباقية اللي وراها مشاغل ومستنية دي، وكمان روحوني الساعة 12 ونص عقبال ماروحت المدرسة في عين شمس بيني وبينها 50 كيلو يعني بتاع ساعتين اروح الاقيها قفلت بسبب البنك الاهلي، وفي الاخر ودوني يوم تاني الخلاصة انهم مابيشتغلوش بذمة.
19th October 2011
البنك الأهلى ممتاز فى التعامل مع الفيزا بيدى اكبر نسبه فى الودائع لكن مشكلته في عدم توافر ماكينات الصرف الألى بالنسبه لباقى البنوك.
16th January 2011
بجد انا اتبسط جدا من البنك الاهلي كسياسية اداره في التعامل مع العملاء, بنك شيك جدا ومنظم بجد سياسه روعه انا زوهلت لما شوفت الفرق بين سياسة الخدمات والاداره في البنك الاهلي ونفسي كل البنوك والمصالح الحكوميه تكون بنفس الاداره والتعامل مع العملاء, انا عن نفسي بتكلم وكمان شجعت كل اصحابي و معارفي لو عاوز تتعامل مع بنوك كنظام وسياسه وتعامل مع العملاء محترم جدا روح البنك الاهلي و ادعيلي. ونظام الودائع ودفتر التوفير لقيت محاسب هناك يفهمني وفهمني وانا وقتها عملت دفتر توفير. واسأل مجرب.
25th June 2010
انا هاتكلم علي خدمه البنك من الفيزا مثلا من احسن الفيز اللي موجوده في مصر من حيث فتره السماح والسداد سحب او مشتريات جربت الفيزا دي فعلا من غير فوائد ذي البنوك الاخري( يا ساتر من غير اي حاجه عايزين ياخدو فلوس من غير اي حاجه من الهوا) بس المشكلة فيه اجراءات الحصول علي الفيزا فيه صعبه جدا جدا جدا علي المستوي العام اكبر شبكه من التغطيه لماكينات ال ايه تي ام في مصر واحسن فيزا ولون فتره القرض طويله والفائده بسيطة بس فعلا لو يسهلوا الاجراءات شويه بجد يبقي فعلا احسن واقوي بنك في العالم فعلا البنك الاهلي المصري بنك اهل مصر اقدم واعرق بنك في مصر
23rd June 2010
البنك الأهلى المصرى هو من أقدم وأعرق البنوك التجارية المصرية ، حيث أنشئ فى 25 يونيو 1898 برأسمال مليون جنيه إسترليني، وقد تطورت وظائف البنك وأعماله بشكل مستمر عبر تاريخه وفقاً للتغيرات الاقتصادية والسياسية التى مرت بها البلاد. ويقوم البنك بدور فريد فى تخصيص جوائز سنوية للإبداع العلمي باسم البنك الأهلي المصري في مجالات جوائز الدولة التقديرية في العلوم . و لوجو البنك يتناسب مع التراث الفرعوني حيث يرمز الإطار الخارجي الأخضر إلى البيت، وترمز نصف الدائرة ذات اللون البرتقالي واسفلها ثلاثة أعمدة بنفس اللون إلى الأشياء الثمينة والذهب. والشعار في مجمله يعني بيت المال والذهب وكل الأشياء الثمينة.
16th June 2010
البنك ده من اقدم البنوك الموجوده فى مصر واعرقها ومحدش بيختلف على خدماته لكن فى حاجه واحده نفسى تتحقق هنا فى مصر , فى فروعه خارج مصر عامل خدمه (الاهى24 ساعه ) دى خدمه تحويل فلوس من الخارج لمصر وبرضه بأقل تكاليف وفى أسرع وقت وممكن اى حد يستخدمها مش شرط ليه حساب او لا .لكن المشكله احنا هنا نستقبل بس لكن مينفعش نرسل بيها للخارج ليه متبقاش ارسال واستقبال هتفرق كتير قوى ولو اتنفذت هتميز البنك وهتضيفله نقطه مهمه لرصيده
الفروع
ارسل رسالة إلى البنك الاهلى المصرى للحصول على المزيد من المعلومات
جميع الحقوق محفوظة © 2021 يلوبيدجز مصر المحدودة
