Al Masa Hotel Nasr City

Pola Adel

فندق تابع للقوات المسلحة. عارفين وانا بوقف تاكسي عشان اروحه, قولتله عايز اوصل الماسية قالي قصدك لبنان.!! وده يفسر اد ايه روعته وجماله اللي ملوش مثيل في دول تانية كتير روحت هناك كان عندنا فرح في قاعة الزمردة ودي الاجمل هناك والاروع والاشيك والفندق فيه قاعتين اللؤلؤة والزمردة بس اتجولت في كل مكان في الفندق وسبت الفرح لأنه سحرني بجماله. هناك فيه كل حاجة ممكن تحتاجها فى هناك مكتبة، إنترنت كافية، صالة بولينج وبلياردو وقاعة الجيم والمطاعم زي الفيروز والجوهرة.

Mohamed Osman

دار هيئة الشئون المالية او الماسة، المكان اسعاره مرتفعة بعض الشئ ودلوقتى كمان عاملين منيمم تشارج فى بعض القعدات، بس هو مكان شيك اوى للى عايز يخرج حد خروجة شيك وتشرف، فى رمضان كانت قعداته جميلة اوى اوى، المكان موقعه متميز فى قلب مدينة نصر وفى نفس الوقت فى مكان مش زحمة، عشان كدة جوه عالى جدا جدا، قعداته ومطاعمه متنوعة المهم لازم تشوف بنفسك لان المكان تحفة وما يتوصفش بس خلى معاك فلوس كتيير.

Hany Fathy

الفندق ده يعتبر دار ضباط هيئة الشئون المالية للقوات المسلحة. والمكان رائع و فيه مميزات كتير أهمها الكافيهات اللى فى حضن الجبل دى حاجة أعتقد مش موجودة فى أى مكان تانى فى مصر وكمان محاط بمساحات خضراء مع الأضواء بالليل بيبقى تحفة. بس هو أسعاره غالية جدا بالنسبة لدور الجيش التانية. أنا شربت عصير مانجو سعره كان 15 جنيه. ولما سألت عن السبب قالوا إن هما مش عايزين يبقوا عامليين زى دار الدفاع الجوى. يعنى زى ما قال حازم هما مش عايزين أى حد يدخل المكان. و من المميزات كمان إن فى صالة بولينغ والميزة اللى فيها إنها مش زحمة مش زى مركز بولينغ تانية تحجز وتستنى دورك. وكمان فى مطاعم متعددة فى مطعم لبنانى ومطعم أسماك فى الجبل وكمان مطعم شرقى يعنى زى ما انت عايز تاكل تختار.

Hazem Ali

يعد الفندق من اروع وافخم الفنادق الخاصة بالقوات المسلحة حيث يوجد بالفندق سياج من الخضرة معمول بشكل خرافة من الجمال على هيئة مدرجات و يتخللها النور بالليل مما يجعل المنظر تحفة فنية وطبيعية. يوجد به حمام سباحة وملعب خاص بلعب الاطفال و اعدات عربية بتجعل الاعدة لها جو عربى جميل و يوجد قاعات مختلفة للافراح على درجة عالية من الفخامة والديكور المتميز بالطابع الملكى. من وجة نظرى بس الاسعار مرتفعة و لذلك بتجده يخاطب فئة معينة و ليس الجميع بس المجمل الفندق تحفة.

Mostafa Abd ElRahman

فندق رااائع حضرت فية فرح من فترة.. نظيف جدا و الديكور حكاية و العاملين يشعرونك انك واحد منهم و المنظر الخارجى يجنن و يعتبر فندق الماسة أحد أروع فنادق القاهرة ويتميز بموقعة المتميز فى مدينة نصر حيث يمكنك إقامة الحفلات والاافراح المتميزة و ينفرد بالأناقة المتكاملة و يتميز بتوفير جميع وسائل الراحة للزوار في جو متناغم و تحفة و يجعل الجو متكامل ليستطيعوا الاستمتاع والأنسجام في هدوء وسكينة و لكن الاسعار مرتفعة جدا نظرا لانة فندق خمس نجوم و ممكن يكون سبعة حاجة فخمة بجد و تفخر ان يكون فى فندق فى مصر بهذة الروعة و التميز. يوجد بة العديد من قاعات الافراح و لكنهم صغيرين فى المساحة و توجد قاعة ماستر هى التى تكفى من 300 – 400 فرد و هم يمتازون بوجود مطرب و شو و منولوجست و فرقة موسيقية و البوفية هناك درجات على حسب السعر.