Air Defense House

Mohamed Adly

الدار مكانه ممتاز والخدمات فيه ممتازة ومتنوعة امن جدا لاولادك وليك انت والاسرة، الدار نضيف جدا ولو انت رومانسى ممكن تاخد خطيبتك او مراتك وتروح بسرعة على فندق تيباروز وتطلع الدور الخامس وتستمتع بالقعدة عالبسين والروف فى نفس الوقت ده لان فيه هناك حمام سباحة فى الدور الخامس، ده غير الجيم الجديد، الجيم بعد التجديد بقة تحفة بجد، الدار مليان مساحات فاضية، ملاعب سلة وبولينج، وحمامين سباحة وفندقين، وياريت لو تروح الدار فى يوم الصبح تستمتع بالشمس هناك وانت بتشرب الشاى بتاعك فى الجنينة وبتقرا الجرنال وولادك بيلعبوا حواليك.

Mohamed Salah Salah Mahmoud

مكان عائلي واجتماعي هايل لقضاء الوقت فيه وكمان مكان ممتاز للتجمعات الاسرية ولتجمعات الاصدقاء لانك تقدر انك تقعد فيه براحتك ومعاك اسرتك بدون اي قلق على الاطفال لانه فيه اماكن وجناين جميلة يقدر الاطفال انهم يلعبوا فيها بأمان تام وكمان تقدر انك تقعد انت واسرتك او انت واصدقاءك في اي مكان تشرب او تاكل اللي انت عايزه لان هناك بصراحة كل المشروبات والمأكولات حلوة اوي وسعرها كمان حلو اوي. انا بعتبر بصراحة انه مكان ممتاز لكل فرد في العائلة لقضاء وقت لطيف وممتع. الجميل كمان ان الدار كبير اوي بحيث انك ممكن تتمشى فيه براحتك وتختار اي مكان تقعد فيه سواء في المناطق الخارجية ناحية الجناين والملاعب او في المنطقة المغطاة عند قاعات الافراح فهناك في قعدة شيك جدا وهادية اوي.

Mostafa Abd ElRahman

دار الدفاع الجوى ليست رقم 3 بين جميع دارات ونوادى القوات المسلحة، ولكن رقم واحد من حيث المساحة والنظافة والخدمة لابناء القوات المسلحة و المدنيين.

Mostafa Abd ElRahman

مكان رائع للتنزة خدمة جيدة و به فندقان 4 نجوم مميز للقوات السلحة و عادى للمدنيين، يوجد 2 حمام سباحة واحد فى الدار وواحد فى فندق جراند تيباروز 5 نجوم جامد جدا. يوجد ملاهى للاطفال و هى جميلة ومزدحمة جدا ولكنها ممتازة. ملحق بالدار جميع المطاعم التى تقدم جميع انواع الطعام تحت مسمى مطاعم تيباروز فيها السمك والبيتزا والحلويات الشرقية والغربية والعصائر و حتى الفول والطعمية تحت مسمى مطعم فلة، وجميعهم ملحقين بالدار. يوجد خدمة التوصيل لمدينة نصر و ما حولها فقط و الخدمة هايلة حتى الكوافيرات للرجال و السيدات ملحقة بالدار للعرائس و نزلاء الفندق. اسعارة اكثر من ممتازة و رخيصة الثمن اما مطعم جاردينيا يقع فى جراند تيباروز يقدم جميع الماكولات لكنة غالى الثمن لكنة فخم للغاية. اما القاعات فهم 6 قاعات اشهرهم الاوركيد وتكفى ل400 فرد، بعدها فى الامتيازات قاعة التيوليب وتكفى ل300 فرد وهى ايضا فخمة جدا, بعدها قاعة البانسية شيك جدا و تكفى 250 فرد اما بقية القاعات من حيث المساحة و الثمن فهى بالترتيب الكاميليا وتكفى ل250 فرد بعدها الباسنت و البرجولا، لكن الامتيازات لابناء القوات المسلحة ثم المدنيين.

Hany Fathy

فعلا زي ما قالت منار هى من أجمل دور القوات المسلحة وتعتبر رقم 3 بعد دار القوات الجوية ونادى الحرس الجمهورى.الدار بتفتح أبوابها للعسكريين و المدنيين كمان بس أنا معرفش رسم دخول المدنيين كام أنا كل اللى بدفعه 5 جنيه باركينج العربية. الدار فعلا بتتميز بالمساحات الخضراء وفى قاعدات كتير فى الحدائق وكمان فى قاعدة داخل الفندق فى التكييف.وفى كمان أماكن مخصصة للأطفال . والمطعم الأكل فيه مش بطال والجيم كمان فى احدث الأجهزة والمدربين اللى فيه على أعلى مستوى بس هو إشتراكه غالى شوية مقارنه بالجيم اللى فى الدور التانية. وكان المنتخب زمان أيام الجوهرى بيعمل المعسكر بتاعه هناك.الدار كمان فيها حاجة مش موجودة فى كل دور القوات المسلحة وهى إن عندهم صالة يولينج على أعلى مستوى. وعندهم كمان قاعة أفراح من أفخم وأكبر قاعات الأفراح وهى الأوركيد. يعنى تقريبا الدار فيها كل اللى يخليها فعلا من أحسن دور القوات المسلحة.

Manar El Kady

من اجمل النوادي الموجودة في القاهرة احلى نادي في نوادي القوات المسلحة قعدته جميلة جدا جدا وراقية والنادي واسع اوي والمساحات الخضراء اللي فيه كبيرة ومنظرها جميل كمان الملاعب فيه ممتازة والبسين بتاعه حلو اوي والقعدة عليه ممتعه, هو بصراحة مكان ممتاز للعائلات والاصدقاء عشان يقضوا فيه وقت ممتع ولطيف. كمان قاعات الافراح والمناسبات الموجودة فيه رائعة وكلها احلى من بعض، كل القاعات هناك شيك اوي اوي وفخمة وحضرت فيها اكتر من فرح كانت جميلة جدا خصوصا قاعة الاوركيد، كمان المطاعم اللي هناك بتقدم اكل ومشروبات حلوة جدا