معهد جوتة - المركز الثقافى الالمانى

Ahmed Ramzy

كانت اول مرة ادخل معهد جوتة تقريبا من 3او 4 ايام، دخلت المعهد مع واحد صاحبي هو كان قالي في مهرجان هناك اسمه Arab shorts، المهرجان دا عبارة عن افلام قصيرة وكل فيلم بيتعرض فيه فكرة معينة الكاتب والمخرج عايزين يوصلوها للي بيتفرج على الفيلم، انا بجد عجبني المكان اوي وحسيت بحاجة غريبة بس في نفس الوقت حاجة حلوة بردو، ان الواحد اول مرة يجرب ويشوف حاجة جديدة زي كدا والناس كلها هناك مع انهم من جنسيات مختلفة بس بيتكلموا مع بعض عادي وبيشتغلوا مع بعض بردو، هما كدا بيثبتوا ان الفن لغة واحدة على مستوى العالم، اجمل حاجة هناك لما تتعرف على ناس جديدة وتتكلم معاهم وتعرف ثقافتهم وافكارهم وكل حاجة عنهم انا شخصيا اتعرفت على مخرجة فرنسية، بجد كانت حاجة حلوة اوي والافلام اللي شوفتها بردو معظمها كان افكارها حلوة ومفيدة فعلا، اجمل حاجة بقة لما دخلنا نشوف الافلام مادخلناش القاعة اللي فيها العرض، احنا قعدنا برا القاعة قدام التليفزيون وعلى الارض، بجد كانت حاجة جميلة اوي وخصوصا ان الواحد بيعمل حاجة جديدة في حياته.