بيت السحيمى

Mark Kamel

بيت السحيمى من البيوت اللى كتير مش واخده حقها ومش مشهوره قوى عند اغلب الناس مع ان البيت جميل وبتتقدم فيه حاجات ثقافيه، ليه قيمه لجميع فئات المجتمع، البيت من البيوت اللى لما تدخلها تشعر انك مش فى القرن ال21 لكن بيرجع بيك الزمن لورا لتتذكر عراقه الماضى، تصميم البيت فعلا بيبهر العيون، مش عارف الناس دى بتتفنن فعلآ فى العماره وتأثير العماره العثمانيه جميله وواضحه فى اغلب معالم البيت، بجد علينا كمصريين اننا نستفاد بكل حاجه ينفع اننا نستفاد بيها يعنى بيت السحيمى ينفع اى حد يروحه على الاقل علشان تعرف تاريخ وتكون معلوماتك كويسه عن كل حاجه فى بلدك.

Manar El Kady

بيت السحيمي هو بيت عربي تقليدي في مدينة القاهرة . اتبنى البيت سنة 1648 واتسمى بإسم آخر من سكنه وهو الشيخ محمد أمين السحيمي الحربي وهو دلوقتي ملك للحكومة المصرية ويستخدم كمتحف للعمارة التقليدية وكبيت للثقافة ومختلف انواع الفنون, للبيت قسمين، القسم القبلي وهو الأقدم، والقسم البحري. يعتبر البيت مثال للبيوت العربية التقليدية بنكهة قاهرية, البيت متأثر بالعمارة العثمانية اللي كانت تخصص الدور الأرضي للرجال ويسمى السلاملك والدور العلوي للنساء ويسمى الحرملك، وعشان كده الدور الأرضي من البيت كله لاستقبال الضيوف من الرجال, بصراحة البيت ده رائع لاني بحب جدا البيوت والجوامع والمباني القديمة مع ان في ناس كتيرة ماتعرفش حاجة عنه الا انه فعلا تحفة من ناحية مساحته و تصميمه و موقعه وكمان الديكور بتاعه ده غير الفقرات الفنية والثقافية اللي بتتنظم وبتتقدم هناك واللي من حق اي حد انه يحضرها ويستمتع بيها مجانا