غرب ووسط الدلتا للنقل والسياحة

Mohamed Osman

طبعا الشركة تعتبر شركة حكومية، موقف الماظة يعتبر من المواقف المميزة لانه فى قلب مصر الجديدة مش محتاج تروح تركب من احمد حلمى، المواعيد كتير وطول اليوم تقريبا خصوصا لمناطق زى اسكندرية ومرسى مطروح خصوصا فى وقت الصيف، بس ليهم عدة عيوب ان الخدمة مش ثابتة، يعنى عندهم عدة انواع من الاوتوبيسات بولمان وسهم ذهبى وكمان فى اى بى VIP، الميعاد بيبقى متحدد نوع الاوتوبيس يعنى ممكن تكون عايز تركب ميعاد معين بس تلاقى الاوتوبيس سهم ذهبى وده بيكون سئ لان الكراسى مش كلها سليمة او ليها مسند للايد وكمان كتير منها مابترجعش لورا وياسلام لو الكرسى اللى قدامك بيرجع وانت مش عارف ترجع لورا يبقى انت حتتذل طول الطريق، لكن اوتوبيسات البولمان محترمة جدا بصراحة وعملوا اوتوبيسات ال فى اى بى من3 سنين وكانت افخم من السوبر جيت لكن ماعرفتش اركبها لانى كل لما اجى احجز فيها الاقيها محجوزة كلها، كمان عندهم نظام جميل ان المواعيد لو اتحجزت قبل ميعادها بفترة بيعملوا مواعيد اضافية استثنائية للناس اللى عايزة تحجز ودى بتبقى نجدة للناس اللى مش لاقية حاجة تركبها وجاية من مكان بعيد زى مرسى مطروح.