هارديز

محمد فاروق ابراهيم عبد الحميد

المحل ده له ذكر جميلة جدا جدا فى حياتى وانا اكتب ذكريات جديدة فى حياتى الجديدة بعد الزواج فى اجمل ايام عمرى وهى اول ايام زواجى من اجمل انسانة على الوجود كله، المهم خرجت انا وزوجتى وكان اول خروج لنا بره اهلى واهلها وكنا بنكشف على الحمل فى شارع القصر العينى ومشينا من عند القصر العينى الى ميدان التحرير وكنا جعانين جدا جدا ودخلنا المطعم وطلبنا 2 ساندوتشات وكان على الجبنة اللذيذة جدا كانت احلى حاجة فى الساندوتشات ودفعنا كام تخيلو 62 جنية ولم نتمكن من طلب اكل تانى وخرجنا من المطعم جعانين جدا بل العكس اكتر من الاول ودخلنا كلنا كشرى وده موقف لا ينسى ودائما نتذكر الموقف ده انا وهى.

محمود ناجى نصرالدين محمد

بصراحة ومن غير مجاملة ان هارديز ده من اجمد واجمل المطاعم اللى بتقدم وجبات جاهزة وسريعة وساندوتشات فى مصر. انا دايما بحب اكل من عنده كتير وخصوصا كل ما انزل وسط البلد من الفرع الموجود هناك فى ميدان التحرير. بصراحة الاكل عنده لا يقاوم ما بلاقيش زيه فى اى مكان اخر. وكمان احسن حاجة فى هارديز انه لى فروع كتير منتشرة فى جميع انحاء مصر بس انا بصراحة بفضل فرع ميدان التحرير. وانا بنصح اى حد ما اكل من هارديز انه يروح وياكل من عنده. ده غير ان الاسعار هناك رخيصة وفى متناول الجميع. ده غير ان الخدمة هناك متميزة جدا والمعاملة بين الموظفيين والزبائن كويسة جدا.

Motaz Bellah Hesham

هارديز من افضل مطاعم التيك اواى اللى موجودة في مصر وده بيرجع لكذا سبب منها نظافة المكان الممتازة والمستمرة و نظافة الطعام نفسه وجوده الطعام بالاضافة الى طريقة الشراء مختلفة عن المطاعم الاخرى وهي انك بتاخد نجمة مكتوب عليها رقم الطلب بتاعك ويوصلك بعدها بعشر دقائق تقريبا او اقل و غير كدة المعاملة الممتازة من جميع العاملين، اما بالنسبة لفرع وسط البلد فأنا في رأيي انه رائع وشيك ونضيف جدا بس هو يمكن ضيق شوية ولكن صراحة انا عمري ما روحته ولقيته زحمة، وانا شايف ان هارديز هو افضل مطعم تيك اواى في مصر.

Ahmed ElGohary Elgohary

عرفت معلومة مهمه جدا عن هارديز فهي سلسلة مطاعم وجبات سريعة يقع معظمها في الجنوب و مناطق الغرب الاوسط في الولايات المتحده ومؤسسها ويلبر هارديز افتتح اول مطعم في غينفيل كارولاينا الشماليه يوم 9 سبتمبر 1960 والمعلومه الجديره بالذكر وهي التي اريد ان اذكرها ان المالك الحالي لسلسلة مطاعم هارديز هو رجل الاعمال المصري محمد الفايد وهذه كانت معلومه بالنسبة لي جديده لذلك وددت ان اذكرها في تعليقاتي و طبعا الاكل هناك و البرجر لا احتاج التحدث عنه لانه بجد طعمه تحفه و جامد الفرايز هناك من الأشياء التي أفضل تناوله فجميع محلات امريكانا بجد مميزين بالفرايز و الكول سلو

Rehab Mohammed

هارديز طبعا أكلة تحفة والبرجر والعيش بتاعة مفيش زية طبعا ومش ممكن تدوق طعمة فى مكان تانى بس أنا أخر مرة رحت فى الفرع دة حصلى موقف مش كويس... كنت أنا و2 أصحابى رايحين وكنا مقررين إن إحنا نأكل حاجات صغيرة فإخترنا إحنا الثلاثة زى بعض ساندوتش صغير وبطاطس وبيبسى المهم المفروض كان حسابنا إحنا الثلاثة 60 جنيه فلقينا البنت اللى على الكاشير قالتلنا تحبوا تضيفوا جبنة شيدر على البطاطس والساندوتش قلنلها لأ مش عايزين أى إضافات.. قالتلنا لأ دا عرض وكدة كدة دا نفس الثمن قلنلها إنت متأكدة قالت أه يا فندم دا عرض إنهاردة.. قلنلها خلاص أوك ضيفى... لقينا الحساب 85 جنية والزيادة دى كانت على الإضافات. طبعا كنا واقفين وسط الناس وزحمة وفى طابور ورانا طويل وإتكسفت أنا وصحباتى نقولها إنت مش قلتى إن دا عرض.. وطبعا دفعنا وإحنا ساكتين. طبعا المشكلة مش فى الفلوس الزيادة بس المشكلة إن هى متعتبرناش أغبية وتضحك علينا علشان نطلب طلب أكبر... بس أنا مش ندمانة على الموقف دة علشان أكيد إتعلمت إنى لازم أطلب حقى ومتكسفش فى اى مشكلة تقابلنى بعد كدة.

Mai Talaat

الفرع ده بالذات مكانه مميز جدا , التحرير بزحمته ودوشته وياااه على الصيف والحر اول ما تدخل هارديز تحس خلاص وصلت لبر الامان الجو العام بتاعه حلو قوى وخدمته هايله والشيش طاوووق بتاعه جااااااامد

Ahmed ElGohary Elgohary

المكان نظيف و كويس للجلوس هناك للراحة بعد متتعب من اللف في التحرير او بعد متخلص زيارة المتحف مثلا لازم تجرب ساندوتش كوردون بلو من هناك تحفة