كشرى التحرير

Muhammed Ahmed

محل كشري محترم جدا وهو اقرب انه يكون مطعم خمس نجوم من انه يكون محل كشري عادي لأنه بجد مختلف جدا سواء في ديكوراته او في نظامه عن محلات الكشري اللي اتعودنا عليها واجمل ما فيه ان فروعه تقريبا في كل مكان في مصر وفي اي مكان هتكون فيه هتلاقي فرع قريب منك وشكله من بره يشدك جدا وهتحس انه فيه حاجة غريبه هتجذبك انك تدخل تجرب وهتلاقي هناك خدمة ممتازة جدا ونظافة ملفتة للنظر وهتحس بمدى رقي المكان ده وطعم الطشري هناك بجد تحفة وقريب اوي من طعم الكشري البيتي وفي مستوى نظافتة وده طبعا يخليك تاكل وانت متطمن.

Mohamed Rezq

اول مره كنت اكل كشري التحرير كنت في جامعة القاهره كان كل اللي بسمعه عنه انه كويس بس متخيلتش وانا باكل اول معلقه من العلبه انه بالجمال ده فعلا طعم مختلف وشكل مختلف وبعد كده رحت بقى للمحل نفسه اللي في وسط البلد وبقيت لازم اعدي عليه كل فتره عشان اكل من عنده بصراحه اجمل فرع اتفتح هو الفرع الجديد في شارع التحرير في الدقي واسع جدا ومنظم جدا وتحس انك في المطار وانت قاعد هناك مش مطعم كشري وياسلام على طريقة التقديم والطلبات اللي بتطلع باسانسير للاكل شكله رهيب فعلا بس بصراحه الاسعار بقت في تزايد مستمر يعني عشان تاكل طبق محترم وتشبع منه مش اقل من 8 أو عشره جنيه فياريت يشوف المشكله دي لاني بجد بعشق الكشري ده

محمود ناجى نصرالدين محمد

كشرى التحرير هو من اشهر واكبر وافضل محلات الكشرى فى القاهرة. وهو ليه فروع كتير بس بصراحة انا ما رحتش غير فرع وسط البلد. بصراحة الكشرى بتاعه لا يقاوم. انا كل لما انزل وسط البلد واحب اكل كشرى باكل من عنده وكمان طواجن المكرونة بتاعته لا تقاوم. وكمان اسعاره رخيصة جدا وفى متناول الجميع بالمقارنة بباقى المحلات.وكمان الخدمة هناك متميزة جدا والمعاملة كويسة جدا بين الموظفيين والناس. وما اقولكوش على نظافة المحل بقة دى احسن حاجة فيه. وطبعا كلنا عارفين ان من اهم حاجة فى المحلات التى تقدم مأكولات او مشروبات هى النظافة. وبجد لازم كلكوا تجربوه وهتتبسطوا اوى.

Ehab Wassily

Koshari el Tahrir, my second favorite koshari restaurant after Abou-Tarek. It's amazing and my favorite branch is the tahrir branch. It's one of their first branches, and also one of the best. It's always crowded though, because it's so famous. You even sometimes see tourists there trying their awesome koshari. Service there is great and everything is clean. Although it happened one time I was there and was drinking water and the cup I was using was not that clean, but no worries.. I just called the waiter and told him and he was more than glad to get me another one after apologizing, and it happened only one time, it's not a regular thing.

Gamal Gamal

بجد بحب كشرى التحرير مووووووووووووووت وطعمه جميل جداا غير اى كشرى ممكن يتاكل فى مصر كلها و اسعاره بسيطة جدااا و حلوة قوى ولاحظت كمان ان جودة الكشرى بتاعته عاليه جدا جدا دة غير الشطة بتعته فعلا مميزه قوى و العدس فيه كتير كمان وبجد انا مهما اقول علي كشري التحرير مش هاقدر اوصفلكوا هو حلو و لذيذ قد ايه انا عالطول بروحوا انا و كل عيلتي و بتبقي بالنسبلنا احلي اكلة و بجد انا بفرح لما بلاقيه في اماكن كثيرة وزعلانة جدا بجد لانه مش موجود في حلوان يارب اشوفك يا كشري التحرير فاتح في حلوان بقاااااااا علشان اكل من عندك كل يوم لاني بجد بحس انه واجهة ممتازة لمصر لاني دايما بلاقي فيه اجانب كتير اوي و ببقي مبسوطه و فخوره جدا انهم بياكلوا احلي اكلة مصرية في احلي مكان في الدنيا و هو طبعا كشري التحرير

Shaimaa Saber

انا بعشق الكشري خاصة لما يكون كشري التحرير لانه جامد جدا ودايما طازة بس هى المشكله انو دايما زحمه جداا وكتير باروح ويبقي زحمه على الاخر ولازم استنى شويه لغاية مايفضى مكان. الخدمه هناك ممتازه والناس زوق جدا بس المشكله ان الاكل بيتأخر شوية . عندهم احجام اطباق كتير ابتداءا من 5 جنيه لغاية 10 وممكن تطلب بصل مقلى او عدس ده تقريبا بيبقى بجنيه بس بيعملو البصل المقلى وهمى واهم مميزات كشري التحرير انو بيعمل اجمد شطه في مصر بجد مشوفتش زيها في اي محل كشري تاني بجد غريبه بتخلى طعم الكشري مختلف ده غير انها مشطشطه جداااااااا وبيعملو دقه والمكان نضيف جدا في معالق بلاستيك وكوبايات بلاستيك للمياه طبعا بعد ماتاكل الكشرى المشطشط لازم تختمها باجمد رز بلبن عشان تطري على قلبك